Thursday, March 15, 2012

ஜெசிக்கு..

இன்னைக்கு அண்ணா பொண்ணுக்கு birthday.
காலைலேயே விஷ் பண்ணியாச்சு.
அட்ட நல்லாக்கீயா?-ன்னு நலம் விசாரிச்சாங்க குட்டிம்மா.
வேலை நேரத்திற்கிடையிடையே வந்துவந்து போன
அந்தக் குரல் இனிப்பு வழங்கி வழங்கிச் சென்றது.
0

உன்னுடைய ஒவ்வொரு
பிறந்த நாளுக்கும்,
இரண்டு பரிசுப்பொருட்கள் என்னிடமிருந்து.

ஒன்று,
இந்த பிறந்தநாளுக்கானது

மற்றொன்று,
இனி வரும்
எல்லா பிறந்தநாட்களுக்குமானது.

0

இன்றைய தேதி
எழுதும் போதெல்லாம்,
உன்னிடம்
எழுந்து வரும் மனதைத்
தடுக்க முடிவதில்லை.

0

நாட்காட்டி,
அலைபேசி,
கைகடிகாரம்,

எல்லாமும்
பெற்றுக்கொண்டது போக,
மீதமாயிருக்கிறது
இன்னமும் சொல்லப்படாத
உனக்கான ஒரு வாழ்த்து!

Tuesday, March 6, 2012

..!!..

கண்ணாடியில் வழியும்
மழை நீரை
உள்ளிருந்து நக்கிப்பருக
முயன்றுகொண்டேயிருந்த
உயர்ரக நாய்க்குட்டியை பார்த்தபடி
நனைந்து கொண்டிருந்தது
தெருநாய்.